India-i Nepal-ji tashi tait linük ka südaktsüner: Pranab

New Delhi, July 18 (Agencies): Honibar nü India linük Tir Pranab Mukherjee-i, Nepal nung yimjung maparen asoshi India linüki pusemer aser linük temzüng tatembangsüa tekaraba nung latetdaktsüner, ta shiogo.
Taoba mapang Nepal Ato kilonser aser Unified Communist Party of Nepal-Maoist Mendenbuba Pushpa Kamal Dahal ‘Prachanda’-i Hokolbar nü New Delhi, Rashtrapati Bhavan-i oa Tir ajurua senden amenba mapang Tir-i item o jembiogo.
“May 2015 nungi Nepal temzüng yanglubaren nung terenlok aliba asoshi India-i temelung chia repranger. Nepal indang temzüng tekaraba nung tatembangsüa latettsü asoshi India-i teti pusema arur. Tawa iba mapa kara inyaka aoba ama maneni inyaktsüla,” ta Tir-i ashiba official sangdong ka ajanga metetdaktsüogo.
“Nepal nung temzüng aser party aika inyakyim nung democracy benoktsü asoshi India yongyaa atar. Nepal yimtenren tashi ieta alitsü aser rongsenkettsüng nung terenlok asoshi India-i pusemer,” ta Pranab Mukherjee-i ashi.
Prachanda-i Nepal nung yimjung maparen asoshi tongtibang shilem agiba aser November 2013 nung yangji constituent assembly election agitetba asoshi Tiri pa nem tenüngsang agütsüogo.