India-i Nepal sorkar den külemi amalitepa inyakner: Sushma

Kathmandu, Tsüklai 2 : External Affairs Minister Sushma Swaraj-i Kathmandu nung Rogonü Nepal Ato Kilonser Sher Bahadur Deuba ajuruba mapang tangokba noksa nung angur.

New Delhi/Kathmandu, Tsüklai 02 (Agencies): India linüki Nepal nung democratic yimya nung shimba sorkar den tesendaktep tajungba yangluner, iba den külemi Nepal linük rongsenkettsüng aser terenlok mapa nung yaritepner, ta tanü India external affairs minister, Sushma Swaraj-i Nepal lenirtem dang metetdaktsü.
Yashi Swaraj Swaraj, Nepal yimtiba, Kathmandu tonga arua liasü, aser tanü lai Nepal Tir, Bidya Devi Bhandari aser Ato kilonser, Sher Bahadur Deuba na ajuru, iba sülen CPN-Maoist Centre chairman ‘Prachanda’ den senden mena liasü.
Tanü iba senden nung Sushma Swaraj-i India aser Nepal tsüngda lenla balala nung tesendaktep tashi itshitsü atema jembi.
Swaraj-i Nepal nung yimtenren lenirtem dang, India-i Nepal nung democratic yimya nung shimba sorkar tasenba den linük anaprong tajangzük angutsü atema tesendaktep tajungba yanglushinr ta metetdaktsüogo, ta tanü India Ministry of External Affairs-i sangdong ka nung metetdaktsü.
Prachanda den senden amendang Swaraj-i, “Nepal nung yimtenren tashi aittsü aser terenlok alitsü atema onoki amalitepa inyaktsü melunga lir,” ta metetdaktsü.
“Election tembangba sülen tang aliba tensa indang, iba den külemi sorkar tasen akumtsü atema renemshiba onük nung onoki o lemtepogo,” ta Prachanda-ia metetdaktsü.
Maoist lenirisa, Swaraj-i tang Nepal tensa indang metetnüa liasü, ta ashi.
Swaraj-i Nepal Ato kilonser, Deuba ajurua election nung takok anguba atema tenüngsang agutsü; Bhandari den senden amendang Swaraj-i Nepal nung election takok ngua agitetba atema la nem tenüngsang agutsüogo, ta External Affairs Ministry sangdong nungsa shia lir.
Tanü Swaraj-i CPN-UML chairman, K P Sharma Oli-a ajurua liasü, pa Nepal Ato kilonser akumtsü imlar.