India-i nisung mn. 271 sensak tia nungi anitetogo: UN

United Nations, July 12 (Agencies): 2006 nungi 2016 küm tashi nung India linüki nisung million 271 sensak tia nungi anitetogo, aser ibaji kiojen, cooking fuel, merükmeju aser chiyungtsü ajungkettsüba ajanga lir, ta United Nations-i metetdaktsü.
UN Development Programme (UNDP), the Oxford Poverty and Human Development Initiative (OPHI) nung 2019 global Multidimensional Poverty Index (MPI) report ya Brihostibarnü metetdaktsü.
Iba report nung shia aliba agi, linük 101 nungi bushisüngdangba ajanga low income linük 31, middle income linük 68 aser high income linük 2 lir ta bushitetogo, aser lenla aika nung sensaker billion 1.3 lir ta bushitet; iba tetezü sensak tia ya income kija agi lateter masü saka temang anema maliba, mapa quality majungba aser amokmeren lenlatema asadanga lateter.
Linük 10 nung nütsüng billion 2 shi nungi sensak tia ajemogo aser ibaji ajanga Sustainable Development Goal 1- sensak tia samatsütsü alizüng ayuba atalokba temaitsü sayur.
Linük terji Bangladesh, Cambodia, Democratic Republic of Congo, Ethiopia, Haiti, India, Nigeria, Pakistan, Peru aser Vietnam lir.
Item linük 10 nungi India aser Cambodia na MPI kanga kera ajemogo.
Kasa osang ajanga ashiba agi, India kübok Jharkhand state nung 2005-06 küm nung saensak tia shilem 74.9 aliba nungi 2015-16 küm nungbo sensak tia shilem 46.5 dang kümogo.
Ethiopia, India aser Peru linüktem nung chiyungtsü, merükmeju, tanur ajema asüba, tajemtsü tzü, school-i aoba, electricity, ki, cooking fuel aser kiojen jenjang tajungba kümogo.
2005-2006 küm India nung sensak tia nung alir nisung million 640 (shilem 55.1) shi liasü aser 2015-16 küm nungbo sensak tia nung alir million 369 (shilem 27.9) dang kümogo.
Tang alima nung tanur asem nungi kabo sensak tia nung lir aser tain trok nungi ka sensak tia nung lir. Sensak tia nung aliba tanurtem ya timbaka South Asia aser Sub-Saharan Africa nung lir.
“Sensak tia anema raratsü atema sensakertem aliba tesem metettsü nüngdak. Parnok ya linük ka nung dang masü mesüra kibong ka nungi dang masü,” ta UNDP Administrator, Achim Steiner-i metetdaktsü.