India-i NSG züngsem akumtsü benokba China-i nokdangtsü

Beijing/New Delhi, June 23 (Agencies): Switzerland yimtiba, Bern nung tang NSG linüktem senden tagidak mapang ka nung Hokolbarnü China-i maneni, NPT tezüngzüktep agia maliba linüktem Nuclear Suppliers Group (NSG) nung adentsü makok, iba tangatetba nungi ozü linük masetshir, ta metetdaktsü.
Tanü China yimtiba, Beijing nung osangbenertem senden ka nung jembidang China foreign ministry otongdar, Geng Shuang-i pai iba osang metetdakja liasü.
Tang NSG linüktem senden tagidak mapang nung China-i linük tangatetba nungi asetshitsü asü, ta asüngdangba langzüdang Geng-i, “NSG nung züngsem tasen agizüktsü atema temzüngtem lateta lir, aser Seoul (South Korea) nung senden amenba mapang nunga iba onük atema jembiogo. Item temzüng nung ajemdaker onoki inyaktsüla,” ta metetdaktsü.
“Züngsem tasen agizüktsü dak sendakba nung, Switzerland nung tang tagidak plenary senden nunga Seoul senden nung lemtetba ama inyaktsü,” ta paisa ashi.
India-i NSG nung züngsem akümtsü atema benoka lir, ajisüaka China-i nokdangyonga arur, aser ibaji ajanga linük ana tesendaktep kongshir.
Ano Pakistan linükia NSG nung züngsem akumtsü atema benoka lir, aser China-i parnok nungiter.
US densema anüdoklen aliba linük aikati India iba telok nung züngsem akumtsü atema nungiter, ajisüaka China-i, iba telok nung züngsemtsü atema Nuclear Non-Proliferation Treaty (NPT) tezüngzüktep agitsüla, ta tekong meranga nokdangba ajanga tetsükdaktsü ajurur. India-i NPT tezüngzüktep agia mali.