India-i NSG züngsem akumtsü menüngdak: Sinha

New Delhi, June 26 (Agecies): Narendra Modi’er sorkari India NSG telok nung kanga densemnüa inyakba atema aija tanü BJP lenir aser taoba mapang External Affairs Minister, Yashwant Sinha-i, ibaji nüngdak-a maliasü aser India-i iba telok dangi temepishiba bener mao tajungba liasü, ta ashi.
BJP lenir tain Sinha-i Modi’er sorkar aiben aija arur aser pai, India-i NSG züngsem magizüktsüla, kechiyong India-i nüngdakbatem linük ket nung lir, ta ashi.
BJP lenir tain arishi küm 83, Sinha-i, “India-i NSG nung kanga densemnüa sayuogo, ibaji menüngdaker. Ni iba ya kü melungjang ajak agi ashir- India-i NSG züngsem magizüktsüla. Iba telok dangi temepishir ka ama maotsüla. Asenok tangutsü tim ajak asenoki nguogo,” ta ashi.
India-i NSG züngsem ka akumtsü atema kanga meranga jembia liasü, aser yakünü Nuclear Suppliers Group Plenary senden nung China-i iba onük nung India anemba ajanga India züngsem akumtsü atema telemtetba magiteti senden tembang.
A B Vajpayee-ia aniba taoba NDA sorkar mapang Sinha ya external affairs minister inyaka liasü, aser pai Pakistan densema Modi’er sorkar foreign policy mapatong aika aija arudar.