India-i onok telung mapa nung teka aitter:Pakistan

Islamabad, March 30 (Agencies) : Tanü Brihostibarnü Pakistan-i, “India-i onoki telung inyakim nung dena teka aita jangjunger aser kiralongrar nem sen teyari agütsür,” ta nenshia metetdaktsüogo.
Pakistan Foreign Office nung otongdar Nafees Zakaria-i, Pakistan li nung Kulbhushan Yadav apuba ajanga India-i linük inyakyim nung teka aitba kuli angur, ta osangbenertem den jembidang ashi.
“Pakistan telung inyakyim nung India-i amuoshiba ya alima rangbeni temetet dang,” ta Nafees Zakaria-i ashi.
India nunger Kulbhushan Yadav ya Research & Analysis Wing (RAW) agent lir ta temulung melemi bilema aser pai Balochistan sorkar anemertem milongsang ajemshitsüba aser CPEC project khenyongi raksatsütsü merangba ken o nung ajemdaker 2016 March ita Balochistan nung apu, ta TV osang ajanga metetdaktsü.
Tan ita tetenzüklen Foreign Affairs asoshi Ato Kilonser indang Advisor Sartaj Aziz-i, Yadav anema First Information Report (FIR) ka züluokba sülen ken o ka benoktsü sentong yangludar, ta senate senden ka nung metetdaktsü.
Pakistan Foreign Office-i Kashmir, India nung aliba Muslim amangertem pusema ashidang, “Iba tesem nung aliba Muslim amangertemji India sorkari kanga mezüngmeshia amshiba nüburtem lir,” ta shisemba TV osang ajangasa metetdaktsü.
“India sepaitemi Kashmir asoshi taküm bendanga agüja asürtem den asüpila sentong agiba mapang injang agi akhar,” ta Zakaria-i ashi.