India-i Pak dang Jadhav chioktsü mepishir

New Delhi/Islamabad, April 26 (Agencies): Bodhbarnü Islamabad nung Indian High Commissioner, Gautam Bambawale-i Pakistan Foreign Secretary, Tehmina Janjua ajurua India senso, Kulbhushan Jadhav nem tasüba temerenshi magütsütsü atema temepishiba shidi ka agütsüogo.
Iba senden tembangba sülen osangbenertem den jembidang Bambawale-i, “Onoki temepishiba ka agütsüogo, aser Kulbhushan Jadhav tekaraba nung chiokdaktsüner,” ta ashi.
Pakistan nunger ozüng inyakyim nung- obendang ka agütsüba sülen anogo 40 tsüngda nungsa temepishiba agütsütsüla.
Jadhav-i itangitiba mapa inyakogo, ta shia April 10, 2017 nü Pakistan nunger military court kati pai aitsü aser pa nem tasüba temerenshi agütsütsü obendang agüja liasü.
India-i agütsüba temepishibaji Pak Army Act Section 133(B) – Court of Appeals nung agütsüogo.
Tanü senden amendang Foreign Secretary, Bambawale-isa Kulbhushan Jadhav ajurutsü atema temelaba agüjang ta takhangba agütsü.
Tesüiba küm ka tsüngda India-i 13 ben tashi arishi küm 46 Jadhav ajurutsü atema mepishia liasü saka Pakistan-i khen danga magizük.
April 14 nüa senden amendang Bambawale-i Januja dang Jadhav anema benokba onüktem aser Jahhav nem obendang agütsüba meshia liasü.
Tan ita tetenzüklen Field General Court Martial-i Jadhav nem tasüba temerenshi obendang agütsüba sülen India-i Pakistan dang, ozü senso nem iba temerenshiji agütsüra ibajibo asa-a nisung tepsetba asütsü aser linük ana tesendaktep mejungi raksatsü, ta shia lir.