India-i Pak yaritsü mulunga lir: Rajnath

New Delhi/Chandigarh, October 17 (Agencies): Hombarnü Union Home Minister Rajnath Singh-i, Pakistan-i kiralongraba factory shibangtsüla, ta ashiba den külemi Islamabad-i kiralongra anema raraba nung India-i yaritsü mulunga lir, ta ashi.
Tanü Chandigarh nung Regional Editors’ conference nung jembidang Rajnath Singh-i, Pakistan-i kiralongrabaji linük mapatong ka kümdaktsüogo aser kiralongrartem jenokdaktsür, ta aitsü.
“Iba yongji South Asia-i dang masü saka alimai-a parnok (Pakistan) sentokogo. Pakistan nung aliba kiralongrar anema Pakistan-i mera agiba nung India-i yaritsü mulunga lir. Ajisüaka iba atemaji Islamabad-i kiralongraba factory shibangtsüla. Ibaji ajanga terenlok lenmang lapoktsü aser South Asia tesem nung tesünep alitsü,” Rajnath Singh-i ashi.
Deobarnü Goa nung BRICS senden nung jembidang Ato kilonser, Narendra Modi-ia, alima nung kiralongraba tetsüji Pakistan lir aser parnoki tesaputiba chirji kiralongraba lir, ta aija liasü.
Paisa, alima linüktemi kiralongra anema mera takang agia inyaktsüla, ta ayongzük.
Tawa Indian army temi Line of Control nung kiralongrar teseptem amakba dak sentakba nung Rajnath-i, ibaji Pakistan nokdangba dang lir, ajisüaka India-i Pakistan nübur anema tamajung tebilemba mali, ta ashi.