India-i Pakistan den tesentaktep tajung yuner: Gadkari

New Delhi/Washington, July 14 (Agencies): India-i Pakistan den tesentaktep tajung yuner, saka parnoki kiralongraba pusemba ya onük tulu ka lir, ta tanü Union Minister, Nitin Gadkari-i metetdaktsü.

Indo-American Chamber of Commerce-i ayongzükba Industry olemtep sentong ka nung India-Pakistan tesentaktep dak sentakba tasüngdangba ka langzüdang Gadkari-i, “Pakistan den tesentaktep tajung ayutsü atema onok tebilemba tajung lir. Onok tsütsülen nungibo tetsükdaktsü kecha mali, saka kiralongraba aser kiralongrar telok (Pakistan-i) pusemba ya onük tulu ka lir,” ta ashi.

Roads & Highways Union Minsiter, Gadkari-i tang US semdanga lir.

Taoba Hokolbarnü Kashmir nung sepaitemi Hizbul commander, Burhan Wani tepsetba sülen India aser Pakistan linük na tsüngda aitsütepba mapang ka nung Gadkari-i iba o jembiogo.

Gadkari-isa, taruba ita 18 tsüngda Chabahar port yangluzüktsü ta India-i imlar.  Iba port ajanga Pakistan majangi India-i Afghanistan aser Russia den indangindanga shishilembatettsü, ta metetdaktsü.