India-i Pakistan nem Uri amakba kulitem agütsüogo

New Delhi, September 27 (Agencies): Monglobarnü India-i Pakistan High Commissioner jaoka, Jammu & Kashmir nung arrtsü ajanga aiter kiralongrartemi lendong agüja India nunger sepai 18 tepsetba kuli tejangja agütsüogo.

Foreign Secretary S. Jaishankar-i  Pakistan High Commissioner to India, Abdul Basit jaok aser September 18, 2016 nü ‘guide’ anati yaria telungpur Uri army camp-i aitdaktsüba osang tejangja metetdaktsü.

“Foreign Secretary-i Uri amakba osang tejangja agütsüogo,” ta External Affairs Ministry nung otongdar, Vikas Swarup-i twitter ajanga metetdaktsü.

Swarup-isa, “Yimtaklirtemi Uri nung guide ana apu aser itemji tang India ket nung lir,” ta Basit dang ashi.

Tang pua aliba guide anaji ka Khiliana Kalan, Muzzaffarabad nungi Mohammed Khurshid’er jabaso arishi küm 19 tain, Yasin Khurshid aser kaji Potha Jahangir, Muzzaffarabad nungi Gul Akbar’er jabaso arishi küm 20, Faizal Hussain Awan lir ta ketdangsertemi jangjaogo.

Muzaffarabad ya Pakistan, Kashmir yimtiba lir aser India anemer telungpur telok balalatem tejenokdak tesem ka lir.

September 18, 2016 nü Uri nung aliba army camp ka amakdang India nunger sepai 18 tepsetba mapang Pakistan nunger ta temulung melemi bilemba telungpur parnok pezü tashi tepsetogo.

Ajisüaka Pakistan-i iba tatalokba nung parnoki shilem agia mali, ta ashir.

Kiralongrar pezüji Pakistan-occupied Kashmir (PoK) nungi Line of Control (LoC) len  Salamabad Nallah ajanga Uri telungi ait südi ta bilemer.

Iba amakba sülen mapang tatsüka tsüngda Director General of Military Operations (DGMO), Ranbir Signh-i, kiralongrartemi bena aliba raraba oset kar nung Pakistan nunger maitsü liasü, aser iba dak sentakba nung Pakistan nema iba osang metetdaktsüogo, ta ashi.