India-i Paris Agreement atema inyaktsü: Dr. Vardhan

New Delhi/Agartala, June 04 (Agencies): United States Tir, Donald Trump-i Paris climate tezüngzüktep nungi pilaba dak sendakba nung tanü India Environment Union Minister, Dr. Harsh Vardhan-i, alima kümzüka ayutsü onüktem India-i khuret bena inyaktsü, ta metetdaktsü.
Osangbenertem senden ka nung jembidang Vardhan-i, “India-i alima kümzüka ayutsü onüktem atema inyaktsü, alima tzü-mopung menenba anema raratsü, biodiversity, arem, ayong aser ajak kümzüka ayutsü atema inyaktsü. Onoki inyakyim shidak benoka tiptema inyaker aser onoki iba atema teti inyaktsü. Onoki shinga dang nungia certificate menüngdaker,” ta ashi.
“Kari onok nungitaka mesüra menungitaka onoki alima tsüngsang-mopung melenshiba atema inyaktsü. Germany aser tanga linüktem nunga Ato kilonser (Narendra Modi)-i, onoki iba onük atema inyaktsü, aser iba tangatetba nungi masetshitsü ta shiogo. Onoki alima tsüngsang-mopung melenshiba atema inyaktsü, aser iba nungji teratatsü kecha mali,” ta paisa ashi.
Vardhan-i anogo asemnü Tripura state semdanga liasü, aser iba mapang nung BJP lenirtem den jembidang pai, taruba state assembly election nung tang sorkar anema nüburtemi vote agütsütsü aser BJP-i taruba sorkar akümtsü, ta metetdaktsü.
“Tripura state nüburtemi state nung küm 20 dak tali sorkar tashi nung aliba party, CPM anema inyaktsü, anungji taruba election nung BJP-i takok angutsü,” ta pai ashi.
Sangküm küm tetenzüklen Tripura nung state assembly election agitsü.