India-i Persian Gulf region nung tesünep aginer: PM Modi

New Delhi/Osaka, June 28 (Agencies): Tanü Japan kübok Osaka yimti nung G20 senden alidang Ato kilonser, Narendra Modi aser US Tir, Donald Trump na jurila senden ka amenba sülen India aser US nati shishilemababa dak sendakba mangatettep bentettsü atema lenmang bushitsü asoshi bangjemogo.
Iba atemaji mezüngbuba mera agia trade minister ana- Piyush Goyal aser Robert Lighthizer na kobi melii senden ka mena telemtetba kar agitsü.
2017 küm Trump aser Modi na senden amenba sülenbo tang mezüng linük ana tesendaktep atema tena senden menogo.
Senden nung okila jembidang Modi-i Iran linük, shishilembaba onük, 5G aser defence onüktem süoka jembi.
White House nungi sangdong ka ajanga, “Lenir anati rongsenkettsüng, shishilembaba, energy, defense aser security, kiralongra anemba aser space tsütsü linük ana tesendaktep indang jembi. Lenir anatisa, khuret abenba democracy linük ama United States aser India na tsüngda partnership ji alima nung yimjung atema kanga tongtibang ta bangjemogo,” ta metetdaktsü.
Osangbenertem den jembidang India foreign secretary, Vijay Gokhale-i, “India-i US dang, US-i Iran nem tenokdangba agütsüba ajanga India kanga aoksar ta shiogo,” ta metetdaktsü. Ato kilonser, Modi-isa Trump dang, India-i Persian Gulf region nung tesünep aginer ta ashi.
Iba dak sendakba nung Trump-i, “Iba atemaji ariteptsü menüngdak. Tatem nungbo ibaji latettsü,” ta ashi.
5G dak sendakba nung Gokhale-i, India nung internet amshir billion junga lir aser market tulu lir, aser India-i aniba nung ajemdaker alima aotsü, ibayongji Ato kilonseri iba atemaji India aser US na longjemer inyaktsü atema shiogo, ta metetdaktsü.
India nung internet amshirtem den market, technology aser design ajanga Silicon Valley’s den külemi 5G technology atema inyaktsü, ta Modi-i shiogo.
Ibaji langzüka Trump-i, pai Tir ka ama US technologies jenjang ajungkettsütsü atema inyakba aser India den iba atemaji inyaktsü jangraba lemsatep, ta foreign secretary-isa metetdaktsü.
Tasüngdangba ka langzüdang Trump-i, India den tesendaktep tulu kaji technology nung amalitepa inyakba ya lir, iba nungji India atema maongka bushitsü, ta ashi.