India-i Ronghiya nunger meindokba atema tebilemtsü akar: UN

New Delhi, Mongputeni/October 03 (Agencies): United Nations’ Special Rapporteur on racism, racial discrimination, xenophobia aser intolerance-i, India sokrari Ronghingya nunger Myanmar-i yoktsü atema inyakba atema tebilemtsü akar; parnok kangshia meindokba ajanga international ozüng sendoktsü, ta ashi.
Myanmar nung Rakhine state kübok Kyauk Daw jila nungi tebur tenet Mongputeni/ October 3 nü meindok. 2012 küm parnoki ozüng alema linük telungi ait ta aija Assam, Cachar district künok Silchar central prison nung puoka liasü.
UN Special Rapporteur on racism, Tendayi Achiume-i, “International teinyaktsü tim inyaka India sorkari reshikangshi, tesempa aser meimchir temeden anema inyakbatem anema inyaktsüla aser parnok nem tekümzükba agutsütsüla. Parnok mapang talangka puoka ayuba atema ni süngmanger. Mapang talangka yamai pua ayuba ya ozüng alema lir,” ta ashi.
Laisa, item nisungtem nem legal counsel magutsübaji tim masü, ta ashi.
“India sorkari parnok ket nung aliba item Rohingya nungerji UN refugee agency nem agutsütsüla liasü, ibaji ajanga parnok kümzüka ayutsü atema asadanga inyaktsü aser parnok indang temedentem metetdaktsütsü liasü,” ta UN nung monginisa metetdaktsü.
Parnok meyipa yokbaji Luroi/August 8, 2017 nü India sorkari tetuyuba nung ajemdaker inyakogo. Ibaji ozüng alema lir ta temepishiba ken o ka Supreme Court of India nung benoka lir.
Laisa, Rohingya nunger 200 shi ozüng alema ait, ta aija India nung pua lir, ta ashi.
“Onoki India sorkar dang International inyakyim benshitsü aser Rohingya nunger densema refugees nem tim temeden agutsütsü mepishir,” ta laisa ashi.