India-i rongsenkettsüng ainba indang asükuma mejembitsüla: Rajan

New Delhi, September 08 (Agencies): Demonetisation sülenbo rongsenkettsüng nung India linük China sülen kümogo, aser iba dak sendakba nung taoba mapang Reserve Bank of India (RBI) governor, Raghuram Rajan-i, küm 10 tashi GDP tashi itta makümdangyongi India-i ‘alima nung rongsenkettsüng tekaratiba ainba linük’ ta mejembi tajungba süla, ta ashi.
Interview ka nung Rajan-i, India-i alima dang sobaliba aser putiotsü indang nungbo tesayuba agütsütsü akok, ajisüaka rongsenkettsüng ainba tsütsübo küm 10 tashi GDP shilem 8-10 ainba sülen ang jembiba tajungba süla, ta ashi.
2016 küm April ita nung pai jembiba o ka nung ajemdaker pai, “Iba mapang nungjagi tenzüka quarter shia (ita asem shia) rongsenkettsüng jenjang ajema kümogo,” ta ashi.
Taküm January-February-March nung India’er GDP shilem 6.1 liasü aser April-May-June nung shilem 5.7 tashi ajema alu. Kasa mapang nung China linük indang GDP bo shilem 6.5 akum.
Rajan-isa, private investment aser exports asentenshiba ajanga GDP shilem 8 mesüra 9 tashi kümdaktsütsüla, ta ashi.
“Asenoki alima dang sayutsüngitsüsa onük aika lir, aser item rongnung sobaliba aser putiotsü dena lir, ajisüaka GDP ainba nungbo asenoki taruba küm 10 nung shilem 8-10 ajangzüktetba sülen ang jembitsüla,” ta paisa ashi.
“1990s mapang nungi tenzüka asenoki shilem 6-7-8 ajangzüktetogo. Asenoki ano küm 10 tashi shilem 2 tali nüngdaker, iba sülen ang rongsenkettsüng nung asenok tashi tait asütsü,” ta pai ashi.
“Asenoki asüküma mejembitsüla (alima nung rongsenkettsüng tekaratiba ainba linük). Saka ano küm 10 tashi shilem 8-10 indaktsütsüla,” ta taoba RBI tongtiisa ashi.
2008 küm alima nung rongsenkettsüng jenjang majungtsü, ta asadangteter alisang, Rajan-isa, “India nunger rongsenkettsüng ya kanga tila, US sen trillion 2.5 dang lir, saka asenoki asenok ya linük tulu ka ama bilemer,” ta ashi.
“China ya India den kanga agia tuluba, joko India aser China na memedemdangteper. Medemdangtsü atema China rongsenkettsüng ainba mezülongi akumtsüla aser India-i küm 10 tashi kanga keraa aintsüla,” ta paisa ashi.
Rajan ya 2013 küm September 4 nungi 2016 küm September 4 nü tashi RBI governor inyaka liasü.