India-i runs 208 agi Bangladesh akok

Hyderabad, February 13 (Agencies) : Bangladesh team tanabuba innings nung spin bowler tem Ravindra Jadeja aser Ravichandran Ashwin nati wicket pezü agia India team-i Bangladesh pur 250 runs nung ajak tugudaktsü. Ibaji ajanga Hombarnü India team-i parnok runs 208 agi akok.
Bangladesh pur 103/3 lia tanabuba innings ait aser mezüng session tashi nung parnok nisung ana tugur 202/5 aküm. Ano süngo ajem tashi nungbo anünga aliba wicket 5 prong tugu.
Bangladesh teloki Jadeja, Ashwin aser fast bowler Ishant Sharma nungeri aonba mapang nung runs junga monguteti timtema liasü.
Rajiv Gandhi International Stadium nung mezüngnü out mesüi alisang, Mahmudullah-i kanga meranga asaya aser pai pa asoshi test half century 13 buba yanglua runs ajak agi 64 yanglutet.
Ajisüaka tanüngba asayartem katia imlaba ama runs mongtet. Parnok rongnung batsman tejen Shakib Al Hasan-ia taoba anogo nung runs 21 yanglua aliba nung runs 2 ang yanglusemer tugu.
Jadeja-i aonba ball ka tera sashia joka atuba ajanga Shakib-i sema aliba glove nung tangshir oa Cheteshwar Pujara-i mela mela apu.
106/4 aliba mapang captain Mushfiqur Rahim aita Mahmudullah den külemi batting atadang tena senteper runs 56 yanglu, ajisüaka Ashwin-i aoba ball ka pa azüklen zükettsüba Jadeja-i asema oa apuba ajanga pa tugutsüsa aküm.
Pa sülen Sabbir Rahman aita Mahmudullah tena senteper runs 40 yanglu. Sabbir Rahman-i runs 22 yanglur out asü.
Tan akokba ya dena Kohli aniba India teloki test series pezübuba atonga atonga akoker asütsü. Parnoki iba jakdang West Indies, New Zealand aser England team tem madak takok ngua lir.