India-i runs 337 agi SA madak takok ngua series kokogo

New Delhi, December 07 (Agencies): Tan asayaba test series asaya pezübuba aser tatembangba, tanabuba innings nung South Africa team-i runs 143 angu nungang India team akoktsü lia India nungeri ajak out sütsü. Anungji Ferozeshah Kotla nung Hombarnü asayaba test asaya nung India-i runs 337 agi South Africa madak takok ngua tan series 3-0 agi kokogo.
Virat Kohli test asaya nung captain shimba sülen tan ya India nung mezüng takok angur asütsü aser September ita nung Sri Lanka madak takok anguba sülen atonga atonga takok angurba lir.
Tan series nung India nungeri mezüng Mohali nung asayadang akok aser iba sülen Nagpur nung tasembuba test akok. Tan iba takok ya ajanga International Cricket Council (ICC) test ranking nung India cricket team tanabuba jenjangi tuogo.
India team nungi tan test series nung ball tajungtiba aonsangji off-spinner, Ravichandran Ashwin liasü. Pai tatembangba asaya tanabuba innings nung runs 61 agütsü aser wicket 5 agi, Umesh Yadav-i runs 9 agütsü aser wicket 3 agi aser left-arm spinner, Ravindra Jadeja-i runs 26 agütsü aser wicket 2 agi.
South Africa team nungi A.B. de Villiers-i runs timba yanglutet. Pai runs 43 yanglua liasü.
Iba asaya nung India team captain, Kohli-i pa dena nisung ti nem ball ondaktsü.