India-i Russia nunger dang hadir aliba jagi meyaritsü: US

New Delhi/Washington, Mongputeni/October 12 (Agencies): India-i Iran linük dang nungi maneni totzü alitsü tebilemba lir, aser Russia dang nungi S-400 missile defence systems aliba jagi meyaritsü; US ketdangsertemi ibaji tenük yoka reprangdar, ta US State Department-i metetdaktsü.
Tamalena State Department-i Iran dang nungi totzü tazü aliba linüktem dang taküm Yimpoksüi/November 4, 2018 nungibo Iran dang nungi totzü malitsüla, mesüra US-i mera agia inyaktsü, ta metetdakja liasü.
US Tir, Donald Trump-i 2015 küm Tehran den nuclear atema tezüngzüktep agia aliba agienba sülen tanü State Department-i iba osang ya metetdaktsür.
US-isa maneni Iran nem tenokdangba kar agutsüogo.
India-i Iran dang nungi totzü alitsü mangaba mesüra Russia dang nungi missile defence systems alitsü atema inyakba dak sendakba nung tasüngdangba ka langzüdang State Department otongdar, Heather Nauert-i, “Ibaji ajanga meyaritsü,” ta ashi.
US-i tekümdangtsü atema tenokdangba agüja liaka India-i Russia dang nungi US sen billion 5.4 indang S-400 Triumf long-range surface-to-air missile system alitsü atema tezüngzüktep agiogo.
Trump-i, Russia den tezüngzüktep agiba atema India nem tenokdangba agütsütsü asü magutsütsüar nenoki yakta metettsü, ta shiogo.
“Pa (Trump) dang Countering America’s Adversaries Through Sanctions Act (CAATSA) sanctions indang asüngdanga liasü aser pai, kobia melii India-i metettsü ta shiogo,” ta otongdarisa metetdaktsü.
India-i Tehran dang nungi totzü aliba dak sendakba nung Trump-i jembiba o lepshia Nauert-i, “Onoki iba atemaji shisadangtsü,” ta ashi.