India-i SF makokba sülen nisung ana asü

Chiteni/July 11, 2019 (Agencies): ICC Cricket World Cup 2019 semifinal nung New Zealand-i run 18 agi India koka parnok asayamung nungi tugudaktsüogo. Run 239 arishiba mapang India nunger mapang ka nungbo wicket 6 out sur run 92 dang yanglur liasü saka Jadeja o Dhoni nati kanga junga asaya parnok nem timla agütsü. India asoshi Dhoni out asüba ya takoksa ulura liasü.
Bodhbarnü India aser New Zealand na tsüngda semifinal asaya reprangba mapang Bihar kübok Kishanganj district nung cricket fan ka temulungjang mapa minyaki küma süadok. Asaya reprangba mapang Ashok Paswan tangola mesashiteti aküm aser pa mozüki anir ao, ta asüsang medemer Dr Devendra Kumar-i ashi. Ajisüaka mapang tatsüka dang lir pa asüba osang doctor temi metetdaktsü, ta pai ashi.
Local reporter Abdul Karim shibai Khabar Seemanchal Facebook page manage asür aser iba osang agüja liasü, pai ashiba agi, Kumar Sadar hospital nung pa mapa tembangba sülen par kidang iba asaya repranga liasü.
FB page nung osang sangdongba nung par kinungeri ashiba agi, India nunger batsmen temi run yangluba mapang Kumar-i poja bomb poka liasü, saka asaya mekoki aoba mapang pa tangola mesapui aküm.
Kasa mapang nung MS Dhoni out asüba sülen Kolkata nunga nisung ka süogo. Cycle ayokba dokan ka kibur iba asaya reprangba sülen asü. Hooghly district nung alir arishi küm 33 tain Srikanta Maity, pa indang phone nung asaya repranga aliba mapang iba tasüba atalok. Pa cardiac arrest süa asü. Times of India sangdong ka ajanga ashiba agi, Dhoni out süba sülen Srikanta Maity dokan nung longdakadok. Pa mozüki anir ao saka tasü bener aru ta metetdaktsü.