India-i Siachen Glaciers metoktsütsü: Parrikar

New Delhi, February 26 (Agencies): Hokolbarnü Union defence minister, Manohar Parrikar-i, India-i Siachen glaciers toktsür maotsü, kechiyong Pakistan dak temelung melemteter aser iba tesem ya toktsüra parnoki iba tesem agitsü akok, ta ashi.

Parrikar-i, Siachen glaciers nung tematiba tesem feet 23,000 nung aliba, Saltoro Ridge ya India-i agia lir, ta ashi.

Tanü Parliament, Question Hour mapang jembidang Parrikar-i, “Onoki iba tesem toktsüra tsükchirtemi (Pakistan) iba tesem agitsü aser parnok ket nung tashi maongka alitsü. Aji oda süra sepai aika taküm lalutsü. 1984 tatalokba (Siachen rara) nungi onoki tangazükba kaogo,” ta ashi.

Paisa, “Iba ya ajanga asenok taküm lalur ta ni metet. Asen sepaitem nem akhüm agütsür, ajisüaka asenoki iba tesem wazüka ayutsüla. Iba tesem ya asameyang tsütsü kanga tongtibang. Pakistan o ji agizüktettsüsa yangi (senden nung) nisung shinga malitsü südi ta ni bilemer,” ta ashi.

February 3, 2016 nü Siachen nung Army camp ka rürjep agi anenbangba lendong nung sepai 10 tashi süogo.

Defence Minister-isa, tesüiba küm 32 tsüngda Siachen nung nisung 915 süogo, ibaji lemdangra küm shia nisung 28 asüba inyakteter. Ajisüaka tangbo kanga ajemogo- kümshia nisung 10 shi dang asür, ta ashi.

Tasüngdangba ka langzüdang Parrikar-i, Siachen nung sepaitem nem tajangzük balala agütsütsü 7th Pay Commission-i benokogo aser item ama tesem nung tenzüker sepaitem nem teyari jenti agütsütsü atema Ministry-i inyaktsü, ta ashi.

Pakistan den International arrtsülen aliba Siachen Glacier lendong nung asürtem atema India nunger mangyimba mapang ka nung Pakistan-i, Siachen ken o latettsü atema mapang tongogo, ta jembia liasü.

Tan ita tetenzüklen Pakistan High commissioner Abdul Basit-i, “Nisung taküm jenti melalutsü atema asen linük ana tsüngda Siachen ken o ya kanga rongtak süa tekaratiba nung latettsüla. Siachen nung alimai bener arutsüba lendong nung nisung jenti mesamatsü asoshi inyaktsü mapang tonger ama onoki bilemer,” ta jembia liasü.