India-i South Asia linüktem indang satellite khakettsüogo

Bengaluru, May 05 (Agencies): Hokolbarnü Geosynchronous Satellite Launch Vehicle-F09 (GSLV-F09) nung India-i South Asia linüktem nem agütsüba Geostationary communication satellite-9 (Gsat-9), Geostationary orbit kati takok ngua khakettsüogo, aser iba ya electric propulsion amshiba mezüngbuba Indian satellite lir.
Tanü nikongdang 4:57 ako meta Geosynchronous Satellite Launch Vehicle (GSLV-F09) ya Andhra Pradesh nung aliba Satish Dhawan Space Centre launch pad nungi khakettsü.
Ato kilonser, Narendra Modi-i benokba project ya ajanga Pakistan linük dak alaka South Asia tesem nung aliba linük tenetprong tajangzük angutsü.
Iba dak sendakba nung Ato kilonser, Modi-i Afghanistan, Bangladesh, Bhutan, Nepal, Maldives aser Sri Lanka lenirtem dang pelaba lemsatep.
Gsat-9 ya ajanga South Asia kübok linüktemi sen kecha meindoki satellite ajanga tajangzük balala angutsü.
Iba project nung India-i sen ajak agi crore 450 shi intok, aser iba nungji satellite kija nung intokba senji crore 235 lir.
Iba satellite ajanga applications, services-television, Direct-to-Home (DTH), tele-education, telemedicine, Very Small Aperture Terminals (VSATs) aser disaster management nung India kidangertem ajangzüktsü.
2014 küm Modi Ato kilonser menden atema tenangzükba agiba sülen hopta ishika tsüngda pai, iba South Asian Association for Regional Cooperation (Saarc) satellite project atema sangdonga liasü.
Taoba hopta Modi-i, iba satellite ya India-i kidanger linüktem nem sen aika jenjang sempet agütsüba lir, ta metetdaktsü.