India-i ‘surgical strikes’ süogo ta asübaji tiyazü:Gen. Bajwa

Islamabad, January 05 (Agencies) : Pakistan Army chief General Qamar Javed Bajwa-i, Pakistan nung India-i ‘surgical strikes’ tanaben süogo ta asübaji tiyazü, ta metetdaktsü.
“Indian COAS-i Pakistan nung tanaben ‘surgical strikes’ süogo ta asübaji General Bajwa-i aitsüogo,” ta DG ISPR Maj Gen. Asif Ghafoor-i sangdong ka ajanga metetdaktsü.
Army nung tekolakba Bajwa-i, “India tsütsü nungi tenokdangtsü mesüra lendong kechisarena aruba nokdangtetsüsa armed force tem teti renema lir,” ta ashi.
Pakistan anema ‘surgical strikes’ joko mesütettsü, ta pai shisem.
India Army chief, General Bipin Rawat-i iba “surgical strikes” ya Pakistan nem osang ka sangoktsütsü asoshi asü aser ano tarutsü mapang nunga iba mesükba mapang inyaktsü atema shingaia menokdangtettsü ta ashiba sülen Qamar Javed Bajwa-i iba taitsüba o ya jembi.
Ano January 02, 2017 nüa Gen Rawat-i, nüngdak tang süra India army-i arrtsülen iba ama mapa inyaktsü kecha nungnanga mali, ta ashi.
Yaküm September ita nunga New Delhi ajanga India army-i Pakistan telung nung aliba kiralongrartem indang ‘launch pads’ nung surgical strikes süogo ta metetdakja liasü. Ajisüaka iba osangji Islamabad-i kanga tekong meranga aitsü.
September 18, 2016 nü Line of Control (LoC) anasa Sri Nagar nung amenoka aliba India army tesep nung aliba India nunger sepia 18 tashi kiralongrartemi amakdang tepset. Iba amakbaji India nungeri Pakistan nem tongloktsü saka Pakistan-i iba lendong parnoki agütsü masü ta aija liasü.