India-i tan mezüngsüa Eden Gardens nung pink ball agi cricket day-night asayaogo

Kolkata, June 19 (Agencies) : India-i Eden Gardens nung tan mezüngsüa pink ball agi cricket day-night asaya Honibarnü asayaogo. Mohun Bagan aser Bhowanipore na tsüngda Bengal super league final asaya nung iba ball tan mezüngsüa amshiba nüburtemi nguogo.
Fast ball aonertem atema iba ball ya kanga junger kechiba süra iba ball ya kanga junga jua aoer ajisüaka spin aonertem atema kanga teyari magütsü.
Umpire Premdip Chatterjee-i, “Ni kanga süngmang,” ta ashi.
“Ni iba ball ya yamai tashi ita alitsü mamang. Aonunga süng iba ball ya kanga jangja angur. Fast ball aonertem atema kanga junger,” ta Chatterjee-i ashi.
Iba asaya over 85.2 nung Mohun Bagan-i nisung 8 out sür runs 276 yangutet.
Mohun Bagan atema Anushtup Majumdar-i ball 131 nung runs 83 yanglubaji timba liasü.
Majumdar-i pink ball kanga tushi jembi. Pai, “Ibai tajangshiba tasen ka liasü. Iba ball kanga jangja angur. Ball ya kanga junga ajuba ajanga mapang tatsüka ni khen timtemdaktsü, ajisüaka bat agi zükteta aküm,” ta ashi.
Bhowanipore telok nungi fast ball aoner Ravikant Singh-i wicket asem tashi agi. Pa ya under-19 World Cup mapang nunga India tenüng nung asayar nisung ka lir.
Iba den külemi ano kasa telok nungi Geet Puri-i wicket ana agi.
Puri-i, “Iba ball ya tera tepongbaba amai bilemer aser iba ball ya kanga junga apa aoer. Ni tanga ball tang nungi iba ya tajungba onteter,” ta ashi.
“Ball temerenbo külenang sentsü adoka yuteter ajisüaka pink ball nung yamaji mesütettsü. Ibaji ajanga pink ball ya mashileni apa maoer,” ta paisa shisem.