India-i taruba ita Rafale tayimtsü angutsü: PM Modi

New Delhi/Paris, August 23 (Agencies): Mezüngbuba Rafale tayimtsü taruba ita India nem agütsütsü, ta Hokolbarnü Ato kilonser, Narendra Modi-i metetdaktsüogo.
Paris nung Modi aser France Tir, Emmanuel Macron na senden amenba sülen tenati osangbenertem den jembidang Modi-i, “Rafale raraba tayimtsü 36 nungi mezüngbuba tayimtsüji taruba ita India nem agütsütsü; iba atemaji onok pelar,” ta metetdaktsü.
2016 küm September ita nung India-i Euro sen billion 7.8 agi Rafale tayimtsü 36 alizüktsü atema France sorkar aser Dassault Aviation na den tezüngzüktep agia liasü.
Taruba ita Union Defence Minister, Rajnath Singh aser IAF tongti Air Chief Marshal, BS Dhanoa na France yimtiba, Paris-i oa mezüngbuba Rafale tayimtsü agizüktsü. Item tayimtsü ya France nunger company Dassault Aviation-i yanglu.
Macron-ia, “Mezüngbuba tayimtsüji taruba ita India nem agütsütsü. Iba ya onok atema tulu ka,” ta ashi.
India nung ketdangsertemi ashiba agi, French Air Force-i amshiba tayimtsütem dang nungi Rafale tayimtsü ya kanga agi tajungba lir, ibayongji sangküm May ita tashi India nunger pilot temi iba tayimtsü amshitsü atema training agitsü.
India nunger pilot tem telok ishikabo French Air Force tayimtsütem nung training agiogo. Indian Rafales tayimtsü anitsü atema sangküm May ita tashi nung Indian Air Force-i pilot 24 nem training agütsütsü sentong lir.
India aser France na tsüngda asalentong partnership nung Defence industrial nung amalitepa inyakba tongti onük rongnung ka lir, ta linük anati külem sangdong ka nung metetdaktsü.
“Tenati defence industry nung maneni amalitepa inyaktsü bangjemba den külemi “Make in India” omen nung ajemdaker linük ana indang defence companies amalitepa inyaktsü bangjemogo, koba ajanga linük anaprong tajangzük angutsü,” ta kasa sangdong nung shia lir.