India-i Tawang tashi railway sendakteptsü asadangtsü

New Delhi, March 31 (Agencies): Centre sorkari China-India arrtsülen aliba Arunachal Pradesh kübok Tawang district railway network agi sendakteptsü asadangdar.
Centre-i Minister of State for Railways, Manoj Sinha aser Minister of State for Home Affairs, Kiren Rijiju na dang, tezülen aliba tesem tashi railway agi sendakteptsü temsüa lir asü maliar asadangtsü mapa lemzüktsüogo.
Iba dak sendakba nung Honibarnü minister anajagi Assam-Arunachal Pradesh arrtsülen railway station tatembangbuba, Bhalukpong nungi Tawang tashi railway yanglutsü atema temsüa ali asü maliar ibaji aasadangtsü atema semdangtsü.
April mezüngnü nungi tenzüka Sinha aser Rijiju nati Arunachal Pradesh semdanga Bhalukpong nungi Tawang tashi kilometer 378 asadangtsü.
Gari ajanga Guwahati nungi Tawang atongtsü ghonda 18 agir. Tawang atema anasatiba tongti yimtiji Guwahati lir.
Iba mapang nung Sinha aser Rijiju nati sensotem, MLA tem aser railway ketdangsertem ajurua jembitsü sentong lir.
Tawang ya India atema kanga tongtibang tesem ka lir, kechiyong iba tesem ya China- India arrtsü nung lir, aser China-i iba tesem ya parnok meyong lir, ta jembir.