India-i Tibet yimtenren lenmang memelenshitsüla: Kiren Rijiju

Baijnath (Himachal Pradesh), November 21 (Agencies): India aser Tibet na tsüngda mapang talangka nungi tesentaktep aliba temelung nung yur India-i Tibet den yimtenren lenmang memelenshitsüla, ta tanü Union minister Kiren Rijiju-i ashi.

“Mapang talangka nungi India nunger Tibet aser par tamangba lenirtem den tesentaktep junga lir. India-i yimtenren lenmang memelenshitsüla. India ya Gautama Buddha aliba lima aser Mahatma Gandhi aliba lima lir,” ta Rijiju-i ashi.

Minister of state for home affairs Rijiju-isa, Bharatiya Janata Party-i aniba NDA sorkari  Buddha Jayanti ya national holiday atema sangdonga liasü, ta ashi.

Honibar nü Guru Padma Sambhava maha puja anogomung nung Palpung Sherabling Monastery (Baijnath nungi kilometer 7 pila oor) Tibet nüburtem den jembidang Rijiju-i, India nungeri Tibet den yimtenren lenmang memelenshitsü indang olenji jembiogo.

Iba sentong nung BJP lenir tain aser taoba mapang Himachal Pradesh chief minister Shanta Kumar-a dena liasü.

“Yaküm onoki sorkar akumba sülen onoki Buddha Jayanti ya national holiday asütsü sangdong. Tamalen iba anogomung ya tesem kar nungdang institution kari munga liasü. Iba onük (national holiday) atema ni Ato kilonser Narendra Modi den jembi aser pai melunga agizük,” ta Union minister-isa ashi.

“India aser Tibet nunger tamangba nung tesentakatep lir. Tamang tesayur Guru Padma Sambhava Tibet-i ao aser anogo ka lir Buddhist tamangba India linüki aru,” ta paisa ashi.

“Dalai Lama-i, India ya tesayur aser Tibet ya nütsüng lir ta jembiogo. Saka iba nütsüng dak temelung lemtettsüsa lir,” ta Rijiju-i ashi.

Iba sentong nung Monastic menden tekolak, 12buba Chamgon Kenting, Tai Situpa-i 1959 küm pa arishi küm 5 asüba mapang India-i aruba bilemteta jembi.

Tai Situpa-i, “India nunger aser India sorkar dak temeim aliba ajanga India nung monastery amenok. Dalai Lama yagi (India) aruba mapang ni tanur ka ama yagi aru. Asenoki India nunger dang pelatsüla. Kanga pelar,” ta ashi.

Rijiju-isa, tanü lokti nung raraba tensa atema tamang lenirtemi agitsü shilem lir, ta ashi.

“Sorkar aser security force tem ajanga dangbo rara menokdangtettsü. Yimjung osang proktsü atema onoki tamang lenirtem dang imlar,” ta ashi.