India-i totzü atema Iran nem $700 mn September ita nung angütsü

 

New Delhi, September 14 (Agencies): Iran dang totzü agiba sen magütsüi aliba nungi shilem ka, US sen million 700, India-i tan, September ita hopta tanabuba nungsa agütsütsüsa akümer.

Hombar nü Finance ministry osang ka ajanga IANS dang ashiba agi, India nung totzü amshirtemi Iran nem agütsütsü aliba sentsüh lemdanger shilem ka aotsü asoshi Reserve Bank of India nung US sen million 700 enoktsütsüla.

“India nunger totzü agiba sentsüh US sen billion 6.5 nungi shilem tesadang ka aodang ‘exchange rate’ nung timtem malutsü atema RBI-i senji tatongi lemsar yoktsü nüngdaker,” ta kasa osang ajanga metetdaktsogo.

Osang ajanga “Mezüngbuba shilemji tan ita nungsa agütsütsü,” ta ashi.

Taoba ita, Iran nem India nungeri totzü agiba sentsüh US sen billion 6.5 agütsütsü aliba nungi US Treasury ajanga US sen billion 1.4 agütsütsü temelaba agüja liasü.

US sen billion 4 dak tera tema agütsütsü anüngbaji instalment küma lemdanger agütsütsü, ta osang ajanga ashi.

Iran-i iba sentsüh ya taruba ita ana tsüngda nung agüjang ta metetdakja liasü. Iba sentsüh ya payment lenmang tem tsükdangba ajanga 2013 küm nungi bendena aruba lir.

Taoba ita Iran nungi Foreign Minister Javad Zarif-i ashiba agi Iran central bank aser sorkar ketdangsertemi India nunger den payment nung ‘technical’ timtem adokba ajak bendeta yanguludar.

Osang ajanga, nangdena aliba sentsüh, US sen billion 6.5ji (sen crore 41,000) tera India sen aser tera dollar mesüra Euro nung agütsütsü, ta ashi.

“Sen agütsütsü asoshi lenmangtem tangbo junga kümdar,” ta finance minister-i ashi.

Pai, “India-i sentsüh agütsüdang India sen yokba agüzüktsü asoshi Iran-i India nunger bank ka den account tasen ka lapokmatsüla,” ta shisem.

2013 February ita nungi India nung totzü amshirtemi iba sentsüh shilem 45 bo UCO Bank, Kolkata branch ajanga India sen agi kepdangogo.

Ajisür külen payment asütsü technical timtet aluba ajanga tanüngbaji magütsüteti aruogo.