India-i U-17 Futsal World Cup nung shilem agitsü

Mumbai, July 08 (Agencies): Alima ajunga nung Futsal asaya ketdang asür, Asociación Mundial de Futsal (AMF)-i jaokba sülen India teloki tan mezüngsüa Under-17 (U-17) Futsal World Cup nung shilem agitsü jenjang nguogo.
Tan July ita 11 nü nungi taruba July ita 20 nü tashi Paraguay nung asayatsü temeten angur telok 12 rong nung India teloka tan densemer lir.
Catalonia, Kazakhstan aser Paraguay den külemi, India teloka Zone ‘A’ telok nung densemogo.
Ano, Colombia, Belgium, Brazil aser Australia Zone ‘B’ aser Argentina, Uruguay, Morocco aser Curazo Zone ‘C’ nung densemba osang angazükogo.
Haryana nung taoba June ita 14-16 nü tashi agiba asayar shimtsü sentong nung tangar dak alia shilem agir asayar 15 shima, India’er U-17 telok tentetba sülen teshimtetba asayartemji taoba June ita 25 nü nungi tenzüka tan July 5 nü tashi Mumbai nung terenemshiba agidakja liasü.
Chennai nunger arishi küm 15 tain Bharat Raj-i aniba India teloki par mezüngbuba asaya Catalonia den tan July ita 12 nü asayatsü lemzüka lir.