India-i UN nung Kashmir atema mejembitsü

New Delhi, Rongjui/September 19 (Agencies): India-i United Nations General Assembly (UNGA) senden nung Kashmir atema mejembitsü saka United Nations züngsem linük ka ama India-i terenlok, yimjung aser security atema shilem tajung agia aruba atema jembitsü, ta Brihostibarnü Ministry of External Affairs-i metetdaktsü.
Brihostibarnü Foreign Secretary, Vijay Gokhale-i, “Pakistan-i jembiba dak sendakba nung ni jembitsü makok. Parnoki (Pakistan) iba onük atema jembinüra ibajibo parnok melung. Asen Ato kilonseri United Nations General Assembly nükjidongtem nung rangloker jembitsü. Iba tetezü Ato kilonseri United Nations nung züngsem ka ama India-i alima nung terenlok, security aser yimjung atema inyakba aser tanga linüktem teimla aser taginübatem atema jembitsü,” ta metetdaktsü.
“Onük aika nung o lemteptsü lir. Item rongnung kaji kiralongra lir, ajisüaka ibaji tongti masütsü,” ta paisa ashi.
India sorkari, Jammu & Kashmir nung Arrla 370 agienba ya linük telung onük ka lir, ta sangdongogo aser ibaji SAARC züngsem linüktem densema linük aikati pusemer.
Taruba hopta United Nations General Assembly (UNGA) senden nung Pakistan linüki Kashmir onük süoka jembitsü ta metetdakja lir.