India-i UNSC nung züngsemtsü merangba nung US-i pusema nungiter

Washington, September 23 (Agencies) : UN Security Council nung India teti atema züngsem akümtsü inyakba mapa nung United States-i maneni pusema nungiter, ta metetdaktsüogo.
Mongulbarnü India-US Strategic & Commercial Dialogue aliba sülen US-i iba osang nenshia metetdaktsü.
“UN Security Council nung India teti atema züngsem kümer tajungba melenshitsü atema US-i pusema nungitba metetdaktsür,” ta Foggy Bottom headquarters, State Department nung Strategic & Commercial Dialogue aliba sülen US-i metetdaktsü.
UN Charter nung lateta aliba ama Security Council-i alima nung yimjung aser tensa tajung alitsüsa mapa inyaktsü asoshi India aser US naprongi inyakdaktsünür, ta külem sangdong ka nung metetdaktsü.
Security Council nung temelenshi bener arutsü atema linük anaprongi tenangzükba agir aser India-US tesentaktep ya Indian Ocean aser Asia-Pacific tesemtem atema dang masü saka alima ajunga nung yimjung aser azükaru maparen asoshi tongtipang lir, ta külem sangdong nungsa shia lir.
US Tir Barack Obama aser Prime Minister Narendra Modi nati mulunga agizükba Joint Strategic Vision for the Asia-Pacific & Indian Ocean Region kübok maneni linük anaprongi Asia nung amalitepa lia inyaktsü, ta yashi senden nungsa bangjemtep.