India-i UNSC züngsem akümba jakdang AFSPA agientsüla: SSSC

New Delhi, October 08 (Agencies): India-i United Nations Security Council (UNSC) nung teti asoshi züngsemtsü onük benokba jakdang tamasa Armed Forces (Special Powers) Acts (AFSPA) ozüng tesashi agientsü takhangba olen ka Save Sharmila Solidarity Campaign (SSSC)-i tanü Brehostibar nü metetdaktsüogo.
Delhi Police-i linük temzüng kübok Arla 309 nung ajemdaker Delhi okadak peisasa taküm agitsü merangba ken o benoka aliba angadangba mapang AFSPA ozüng anemer, Manipur tsür Irom Sharmila yashi aser tanü, Brehostibar nü naprong adenba osang jangjaogo.
“2006 küm Jantar Mantar ken o nung ni aibelena meinyak kechiyong ni küsasa kü taküm agitsü memerang,” ta Sharmila-i okadak metetdaktsü.
“India sorkari tang benokba AFSPA ozüng tesashi ya democracy yimtenren yimya den mapetba ozüng lir aser kasaji tekaraba nung agientsüla,” ta lai okadak nenshia ashi.
“Sharmila-i chiyongtsüa mechi nübur temeten asoshi lungkak aiter ta ajaki meteta lir. Ajisüaka, la anema peisasa pei taküm agitsü merangba ken o okadak benoka la tepuokdak ayu. Iba ama inyakba ya ozüng amshibaren nung tamakok lir aser alima nung democracy benshiba linük tulutiba, India-i nüburtem nem agütsüba temeten anema inyaker ta kuli tejangja angur,” ta okadak Sharmila den ajurutepba sülen SSSC Convenor, Ravi Nitesh-i osangbener den ajurutepdang metetdaktsü.
India-i UN mendenti nung shilem agia alima jenjang nung yimtenren sentong aser temzüng ozüng yangluba maparen nung tongti shilem agitsü maparen inyakba jakdang tamasa AFSPA ama nübur temeten ajemrepba ozüng tesashi agientsü nungdaker, ta pai ashi.
India-i AFSPA ozüng amshitsü melaba ajanga mitkartemi India sorkar den ken o benokba tesem aika nung nübur temeten anema inyakba kuli balala sorkari national aser international jenjang nung tentetba ludentemi bushiteta lir.
AFSPA ozüngi mitkartem nem tashi balaka agütsüba yong parnoki ozüng alema inyak aka parnok memerenshitetter.
SSSC teloki küm ishika tejaklen nungi tenzüka India nung aliba state ajunga aser bendang linüka kar nungbo lokti sentong balala ayonga AFSPA benokba osang prokshiba den külemi, AFSPA benokba tesem ajunga nungi iba ozüng tesashi agientsü takhangba benoktsü tenzüka lir.
AFSPA-i kümzüka ayuba yong mitkartemi tetsür takümtem tashiyim agi raksatsüba, par mulungka agi nisung oda tepsetba aser parnoki temulung melemi bilemba nisungtem pua bener orr tanaben mechioki oda parnok indang osang mangashi akümba kuli jenti nüburtem temeten atema nokdakba tentettem dang masü saka sorkari tentetba ludentemi bushiteta lir.
“Manipur aser Jammu & Kashmir na densema, AFSPA benokba tesem ajunga nungi iba tesashi ozüng tekaraba mapang nung agientsü akhanger. Iba alizüng tekaraba mapang nung atongtsü asoshi state aser centre sorkar nati amalitepa inyaktsü akhanger,” ta Nitesh-i metetdaktsü.
“AFSPA ozüng agientsü takhangba ya national dang masü international jenjang nung nübur temeten asoshi nokdakba tentet balalai benoktsü tenzüka lir. Alimai India tushitsü tenzükba mapang ka nung iba ama democracy inyakyim aser nübur temeten anema inyakba agi India nem tenüngmenük tulu bener arutsütsü,” ta pai ashi.
“Ozü SSSC teloki AFSPA ozüng ya agientsü asoshi tanen makai inyaktsü nangzüker,” ta Nitesh-i shisem.