India-i US anema vote agütsübaji aibelen ka inyakogo: Swamy

New Delhi, December 22 (Agencies): Mapang shia BJP MP, Subramanian Swamy-i party anema odiodia jembir, ajioda tanga pai, Jerusalem onük nung India-i UN nung US anema vote agütsübaji aibelen ka inyakogo, ta ashi.
Twitter nunga India nunger aikati Swamy-i jembiba o nungji ai-aura akar.
Tan ita tetenzüklen US-i official süa, Jerusalem ji Israel yimtiba lir, ta sangdonga liasü.
Yashi UN General Assembly (UNGA) nung US-i iba telemtetba agiba anema vote agütsütep, aser US anema vote agütsür linük 128 rongnung India-a densema lir; item linük 128-i, Jerusalem onükji Israel aser Palestinine nunger tsüngda lemtettsüla, ta ashi.
Mapang talangka nungi Swamy-i Israel pusema arur, aser pai, India-i linük nüburtem anema vote agütsüogo, kechiyong “Palestine nungeri kodanga Kashmir onük nung India pu-masemer, ajisüaka Israel-ibo mapang ajak nung India pusemer,” ta ashi.
BJP MP-isa, West Jerusalem ji Israel meyong lir, anungji US-i Jerusalem ji Israel linük lir, ta sangdongba nungji kecha tashishitsü mali, ta ashi.
India aser Israel linük na tesendakatep tajung lir, aser taküm July ita nunga India Ato kilonser, Narendra Modi aser Israel Ato kilonser, Benjamin Netanyahu nati akhangjungshitepa liasü, ajisüaka tang India-i Jerusalem onük nung US anema vote agütsüogo.
Ibayongji Twitter nung India nunger aikati India-i UN nung US anema vote agütsüba atema ola adoker.
Israel nunger osangkaket, Haaretz nungi otongdar kati, taruba ita Netanyahu-i India semdangtsü, ta metetdaktsü.
Twitter ajanga India nunger katibo, India-i agütsüba vote ji, tesülen nungi Israel yirutsüba mesüka lir, ta ashi.
Ano nisung katibo India-i agütsüba vote ji “putiotsü asütsüsa aibelena inyakba ka lir,” ta shia Modi aser Netanyahu na aser Modi aser US Tir, Trump na tamalen tangokba noksatep lemsatep.
Ano India nungeri aikati, oda India-i vote magütsüba tajungba süla, ta ashi.