India-i USCIRF nem visa magütsüba atema jashir: Robert B George

Washington/New Delhi (Agencies): US commission kati India semdanga linük nung tamangba yimsü balala sadoksadoka amangtetba jenjang asadangtsü aser ketdangsertem aser tamangba yimsü balala nungi lenirtem ajurua o lemteptsü sentong liasü, ajisüaka India sorkari parnok nem visa magütsü.

United States Commission on International Religious Freedom (USCIRF) nungi züngsem asemi-i Hokolbar anogo nungi tenzüka hopta ka India linük semdanga sorkar ketdangsertem, tamangba yimsü balala nungi lenirtem aser India nung lokti atema inyakertem ajurunüa liasü.

“India sorkari onok nem visa magütsüba atema jashir,” ta USCIRF Mendenbuba, Robert P George-i ashi.

“Tamangba yimsü balala aliba aser democratic linük ka den külemi United States den parner ka ama, India-i tamang kaketa onoki semdangtsü melatsüla,” ta pai sangdong ka ajanga ashi.

USCIRF nem India-i visa magütsüba ya tang mezüng masü saka tamalena visa magütsüi liasü. Item züngsemtemi alima linük balala nung tamangba yimsü sadoksadoka amangtetba indang osang bendendar.

Tamalen UPA sorkaria parnok nem visa magütsüi liasü.

USCIRF-i Pakistan, Saudi Arabia, Vietnam, China aser Burma linüktem densema tamangba yimsü sadoka mamangtetba linük aika semdangogo, item linüktem dang nungibo India-i ang melatsü ta amanga liasü, ta George-i ashi.

Parnoki India semdangtsü atema New Delhi nung state department aser US embassy-ibo melunga liasü, ta kasa sangdong nung shia alir.

You must be logged in to post a comment Login