India-i Volkswagen nungi mokozü adokba tendangtsü

New Delhi/Mumbai, September 25 (Agencies): India sorkar-i, linük nung gari nungi mokozü ajema adokdaktsütsü lateta aliba ozüng alema Germany nung yangluba gari, Volkswagen-i US nung ama India nunga benshi asü mebenshiar jangja metettsü asoshi bushisüngdang asütsü tetuyuba agütsüogo.
Iba dak sentakba nung parnoki US-i ashioktsüba meteta aruba sülen India nunga iba bushisüngdang tenzüktsü metetdaktsü.
Mumbai nung sentong ka nung nisung aika sentepa alidak, Heavy Industries & Public Enterprises Minister, Anant Geete-i, Automotive Research Association of India (ARAI) dang onoki iba gari nungi mokozü adokba tendanga bushisüngdangtsü asoshi tetuyuba agütsüogo, ta metetdaktsüogo.
“ARAI dang iba dak sentakba nung bushisüngdangtsü aoshi shiogo. Anungji September 30 nü tashi nung mezüng osang angashitsü imlar,” ta Geete-i Mumbai nung ashi.
Anant Geete indang office ajanga ashiba agi, Pune nung tongti office aliba, ARAI nungi tekolaktemi anir telok kati September 30 nü minister nem iba bushisüngdang indang mezüng osang agütsütsü.
ARAI ya automotive industry aser ministry of heavy industries na tsüngda bushisüngdang asür telok lir.
Iba jakdang heavy industries secretary Rajan Katoch-ia, ARAI nem iba bushisüngdang asütsü nungloktsüogo, ta ashi.
“Onoki ARAI dang Volkswagen gari dak nungi mokozü adokba yimya bushisüngdangtsü shiogo. Iba ama inyakyim aser tatalokba tem asenoki nokdangtsüla,” ta Katoch-i New Delhi nung ashi.
Europe nung gari yanglur tettsüti-i, US nung gari nungi mokozü adokba tendangdang ozüngi meleba ama putettsü asoshi parnoki software ka amshi, ta metetdaktsüba sülen iba osang alima sünga prokshi.
Company-i ashiba agi, parnopk meyong 1.6- aser 2.0-litre diesel engine keta aliba gari ajak dak iba software enoka lir.
US nung 2009 nungi 2015 tashi nung adokba Jetta, Beetle, Golf aser Audi A3 model gari tem den 2014-15 nung yangluba Passat garitem dak iba software enokja aliba ajanga tendangba mapang ozüngi melaba ama mokozü adokba sayur. Item diesel agi jajaba garitem ya US dang nungia Eurpoe lima nung tamshiba lir.
Iba maksü ajuruba sülen sen nangzüktepa zülutepa noklang nung shilem 30 agi ajema kümogo.
Iba maksü nembangtsü asoshi Volkswagen-i US sen billion 7.3 lateta yuogo.
Ibai atalokba sülen Bodhbar nü company nung chief executive Martin Winterkorn mapa nungi anenogo.
Winterkorn-i, “Ni iba osang angashia kanga aoksa kechiba süra iba mapa tamajung inyakba ni kecha memetet,” ta ashi.
Germany nung ozüng meteter temi iba nung bushisüngdang asüstü sentong lir.