India-i West Indies den T20 Cricket Series US nung asayatsü

New Delhi, August 02 (Agencies): India aser West Indies na tsüngda Twenty20 (T20) cricket series asaya 2 tashi US nung asayatsü renemba osang ka Board of Control for Cricket in India (BCCI)-i tanü, Mongolbar nü metetdaktsüogo.
“Tang West Indies den tasayadak Test series tembanga asayaba sülen India cricket team-i par telok den maneni T20 series asaya 2 tashi US kübok Florida yimti nung tentetba Central Broward Regional Park nung tan August ita 27-28 nü tashi asayatsü renemogo,” ta BCCI-i metetdaktsü.
Tang West Indies kübok Trinidad nung tasayadak asaya 4 densemba Test series tan August ita 22 nü atemtsü.
India telok den T20 asaya 2 tashi asayatsü temepishiba shiti ka West Indies cricket ketdangsertemi anogo ishika tejaklen benokba osang ka Broward Parks & Recreation Manager, Duncan Finch-ia metetdaktsüogo.
Ano külen, 2016 Caribbean Premier League asayamong Florida nungsa taoba July ita 28-31 nü tashi asayaba osanga jangjaogo.