India-Indonesia-i defence tesentaktep atema inyaktsü: Modi

December 12, 2016 nü New Delhi, Rastrapati Bhavan nung Tir, Pranab Mukherjee-i Indonesia Tir, Joko Widodo aser pa kinüngtsü, Iriana na agizüka salemba noksa nung angur. Kasa noksa nung Ato kilonser, Narendra Modi-a angur. 

New Delhi, December 12 (Agencies): Hombarnü Ato kilonser, Narendra Modi-i, kiralongra anema raratsü asoshi India aser Indonesia napronglai defence aser security nung tesentakatep tashi itshitsü atema bangjemogo, ta metetdaktsü.
Tanü Indonesia Tir, Joko Widodo-i India semdanga lir, aser tanü tenati osangbenertem den jembidang Modi-i, democracy aser lokti yimjung nung alitsü onüktem nung linük ana lemsateper aser shishilembaba den sobaliba nung tesentaktep akanga lir, ta ashi.
Tanü New Delhi, Hyderabad House nung linük ana tsüngda tezüngzüktep aika agiba sülen Narendra Modi-i, “Act East Policy nung asen partner rongnung Indonesia linük densema lir. Rongsenkettsüng aser strategic nung kasa tangatetba lir. Onoki defence aser security nung amalitepa inyaktsü bangjemogo,” ta ashi.
Modi-i ashiba agi, pai Widodo den jembiba onüktem rongnung- kiralongra anema raraba, telok tenteter ozüng alema inyakba, mozü aser nisung shibelenba anema raratsü onüktem jembi.
Widodo-i tanü nungi tenzüka anogo ananü linük semdanga lir. Tanep Rashtrapati Bhavan nung sentong ka ayonga pa agizüka liasü.