India-Israel tesendaktepji kodak nung yanglu: Netanyahu

Mumbai, Aenjeti 18 (Agencies): Brihostibarnü Israel Ao kilonser, Benjamin Netanyahu-i, India aser Israel tesendaktepji kodak nung yanglu, ta metetdaktsü.
Tanü Mumbai nung India-Israel Business Summit nung jembidang Netanyahu-i, pa aser Ato kilonser, Narendra Modi na tesendaktep tajungba akumer, ta metetdaktsü.
Pai India anogo pezünü semdangba tatembangbuba anogo nung pai, “Ni India, lar nüburtem aser sobaliba kanga akhümtsübur,” ta ashi.
“Asenok (India-Israel) ya alima nung sobaliba tejentiba ana lir. Asen linük ana nung democracy lir, asenoki nüjiso meimba lemsateper, aser asenoki meimchir temeim lemsateper. Onok ya atangji nenok partners lir. Iba tesendaktep ya kodak nung yanglu,” ta Netanyahu-i ashi.
Paisa India nung shishilembartem dang Israel nung sen indoka shishilembatsü mepishia metetdaktsü.
Netanyahu-i ashiba agi, mapatong aika benokba inyakba ajanga pai Israel rongsenkettsüng jenjang yanglutsü, aser iba amaji Ato kilonser, Narendra Modi-ia inyaker.
“Ni Ato kilonser Modi den jembidang paia kasaji inyakba ni metet. Pai mapa inyaker, mapa tasen purapiteta inyakba pai angateta lir,” ta Israel lenirisa ashi.
Netanyahu-isa, par sorkari mera balala agia inyakba ajanga Israel jenjang 12 agi tajungba küma World Bank’s competitive index rankings jenjang 15buba nung lir, ta ashi.
US, Singapore aser Switzerland linüktem iba rank nung Israel dang nungi tajungba lir, ibaji ajanga pa melung animesüngzükteter, ta paisa shisem.
Yashi Ahmedabad yimti nung ‘iCreate’ innovation hub semdangba dak sendakba nung pai, pa Israel nung kazür ama bilem, ta ashi.
“Iba ya tetenzüker ka dang lir, ano teinyaktettsü jenti lir,”ta paisa shisem.
Hombarnü New Delhi nung Ato kilonser, Modi aser Israel Ato kilonser, Netanyahu na leniba nung senden ka amenba sülen India aser Israel na tsüngda cyber security aser oil & gas densema onük teku nung tezüngzüktep agia liasü.
Linük ana tsüngda tezüngzüktep rongnung Cyber security, Ministry of Petroleum & Natural Gas aser Israel Ministry of Energy na tsüngda oil & gas sector nung tezüngzüktep, air transport amendments tezüngzüktep, film-co-production atema tezüngzüktep, Central Council for Research in Homeopathy, Ministry of AYUSH aser Centre for Integrative Complementary Medicine, Shaare Zedek Medical Centre of Israel na tsüngda homeopathic medicine research agiba nung yaritepa inyaktsü atema tezüngzüktep, space nung amalitepa inyaktsü atema tezüngzüktep, metal-air batteries nung amalitepa inyaktsü atema tezüngzüktep aser concentrated solar thermal technologies nung yariteptsü atema tezüngzüktep agia liasü.