India-Japan tsüngda defence, nuclear tezüngzüktep agiogo

New Delhi, Dec. 12 (Agencies): Tanü New Delhi nung Japan Ato kilonser, Shinzo Abe-i India nung tang mezüng bullet train yanglutsü atema US sen billion 12 aputsütsü sangdongogo aser linük ana tsüngda Defence tesentaktep tajungba akümtsü aser nuclear energy nung yariteptsü tenangzüktep agiogo.
Asia nung rongsenkettsüng tanabuba aser tasembuba jenjang nung aliba linük anati Asia nung tashi kanga ulua akümba linük, China den liromedemtsü atema Abe aser Modi na bangjemogo.
Defence tezüngzüktep agiba dak sentakba nung linük ana tsüngda technology, osettsüset aser military osang lemsateptsü, ajisüaka iba nungji US sen billion 1.1 jenjang Japan nunger aircraft ayoktsü indangbo maden.
Civil-nuclear technology dak sentakba nung Modi-i, “Nuclear energy nung amalitepa yariteptsü atema tezüngzüktep agibaji commerce aser clean energy dak alia lir. Iba ya kati ka dak temelung lemtepba aser alima kümzüka tesünep nung alitsü atema tesentaktep nung jenjang tasen ka yangluba temaitsü lir,” ta ashi.
Ato kilonser anati külem sangdong ka ajanga South China Sea indang süoka “tesem (Asia) nung tensa raksatsüsa linük ajaki kijai lemtetba nung meinyaktsüla,” ta ashi.
China-i South China Sea tuluka atsünger. New Delhi (India) aser Tokyo (Japan) naprongla Beijing (China) den arrtsü mangatettep lir, ajisüaka tzüyim lenmangbo merakteper. Aji oda süaka China sepaitemi ambangyima Japan nunger rong ajanga shishilembaba lenmang tashi aruba ajanga shisabulur, aser iba dak sentakba nung Abe aser Modi nati International tzüyim nungbo sademsadema senzütsüla, ta shiogo.