India ji Britain indang tembar tajungtiba lir: Theresa May

London, November 06 (Agencies): India ji UK atema tongtibangtiba aser tembar tajungtiba lir aser alima nung tashi aliba linük ka lir, ta Deobarnü London nung Ato kilonser, Theresa May-i ashi.
UK adener lai tang mezüng India semdangtsü apusodang Theresa-i, lai anogo asemnü New Delhi aser Bengaluru semdangba mapang Britain tajungtiba agi ajungkettsütsü tebilemba lir, ta lemsatep.
Laisa, “Onok atema tongtibangtiba aser chichiba tembar rongnung alima nung tashi aliba linük, India lir, parnok den onok putiotsü, sobaliba aser tongtibang onük aika lemsateper,” ta ashi.
“Ano tanga oren nung, ozü linük ana tesentaktep tashi tait, tesentaktep tain aser ibaji tajungtiba akümtsü maongka lir,” ta laisa ashi.
“Ibayongji tanü ni Europe adener tang mezüng Ato kilonser ka ama linük tesentaktep atema semdangtsü apusor. Kü den small & medium enterprises nungi densema British nunger shishilembar tongtitem aoer,” ta laisa metetdaktsü.
India semdangba mapang lai Hombarnü Ato kilonser, Narendra Modi den linük tesentaktep ken o jembitsü.
“‘Smart Cities’ 100 yangertsü, ‘Make in India’ nung sen intoktsü company tem dang ajungshiba, ‘Digital India’, anema alibaren tajungtiba agütsütsü, infrastructure, skills aser  finance jenjang ajungtsüji Ato kilonser Modi mangdang lir, aser onok ket nung alima nung tajungtiba architects, lawyers, financiers, engineers, medics, shisashirtem aser technical mongintem lir, anungji iba nükjidong ataloktsü atema yaritsü asoshi Britain ji tetemjen partner ka lir, koba ajanga mapa adokdaktsütsü aser linük anaprong aintsü,” ta laisa ashi.
“Ni India nungertemi Britain nung sen intokdaktsüner, ni British company temi India nung inyakdaktsüner, aser linük ana mangdang ataloktsü atema Ato kilonser Modi den külemi inyakner,” ta laisa shisem.