India kübok district 364 nung coronavirus puteta lir

New Delhi, April 12 (Agencies): Deobar aonung 9:00 ako tashi nung India nung COVID-19 aketer ajak agi nisung 8,447 jungogo aser tasür 273 liasü.
Linük kübok district 364 nung COVID-19 wara prokshiogo aser anogo pezü tsüngda district tasen 80 tashi nung iba wara menatepogo.
Tesüiba ghonda 24 tsüngda nisung 909 dak COVID-19 puteta liasü aser nisung 34 asü, ta Deobarnü Union Health Ministry-i metetdaktsü.
Tanü New Delhi nung Health Ministry nung Joint Secretary, Luv Agarwal-i osangbener dang ashiba agi “March 29 tashi nung India nung nisung 979 dak COVID-19 puteta liasü saka tanü tashi nung nisung 8,477 jungogo. Shiranger 764 tashi taneptsü ngur mozü ki balala nungi anizükogo.”
India map nung COVID-19 aser virus-free zones ta lemsatsü atema Red, Orange aser Green ta bendangtsü.
Green zones ya COVID-19 puteta maliba district tem nem agütsütsü. Tang tashi nung COVID-19 puteta maliba district 400 shi lir.
Orange zones ya COVID-19 aketer nisung 15 den tajemba putetba district tem nem lemzüktsütsü. Item district nung public transport tera lapoktsü aser aluyimba napa inyaktsü temelaba agüsütsü.
Nisung 15 den teimba dak COVID-19 puteta aliba district tem dang Red zone ta ajatsü aser item district nung maparen kecha meinyakdaktsütsü.
Maharashtra, Odisha, Punjab, West Bengal, Karnataka aser Telangana state temi novel coronavirus prokshiba azüoktsü atema April 30 tashi parnok state tem shibangtsü telemtetba agiogo.
Honibarnü Prime Minister Narendra Modi aser state Chief Minister tem ghonda pezü tashi senden ka amendang linük ajunga shibangba ya ano hopta ana talila atsülangtsü atema nisung teimba kati tebilemba lemsatepa liasü.