Vrindavan (Uttar Pradesh), March 06 (Agencies): Deobarnü Union finance minister, Arun Jaitley-i Congress tatong Tir, Rahul Gandhi-i India nung telemsa aika adokdaktsünertem pusemer, ta aitsüogo.
BJP lenir Jaitley-isa JNU kaketshir telongjem Tir, Kanhaiya Kumar-i jail nungi aluba sülen JNU campus nung jembiba onük aija, India anema yimyim ayimba ajanga pa tepoukdaki yok saka tepoukdak nungi aluba sülenbo pai ‘Jai Hind’ ta yimyim ayimba den linük wako ayipshir, ta aitsü.
BJP youth wing, Bhartiya Janata Yuva Morcha senden nung jembidang Jaitley-i, Congress tatong Tiri Jihadist telok tila ka aser Maoists telok tulu ka pusembaji India atema tia maka, ta ashi.
Rajul-ibo linük nung telemsa adokdaktsünertem pusemer ta aija Jaitley-i, “Tesüiba küm 100 tsüngda linük meimertem aser linük anemertem raraba nung teti agia Congress-i linük nung telemsa adokdaktsünertem anema liasü,” ta ashi.
“Yimya tasen ka tentetogo. Nisung kari Yakub Memon bilemteta sentong ayongzükner aser kari Afzal Guru bilemtetner. Item nisungtem ya jihadists telok tila ka aser Maoists telok tulu ka lir,” ta paisa ashi.
“Linük nung telemsa aika adoktsü atema yimyim ayim aser Congress leniri ibaji pusembaji linük atema tia maka,” ta pai ashi.
Bhartiya Janata Yuva Morcha anogo ana senden nung JNU ken o, opposition-i Modi sorkar aitsüba aser BJP onüktem tongtibangsüa jembiogo. Iba senden nung BJP Tir, Amit Shah, party Chief Minister tem aser Union Minister temi Congress, talisa Rahul Gandhi aija jembi.
Linük nung temelenshi tulu ka adokdar ta shia Jaitley-i, kibong kati yimsüsübaren 2014 Lok Sabha election nung tamakok ngudaktsüogo, ta ashi.
Paisa, Jan Dhan Yojana densema sorkari benokba scheme balala metetdakja liasü.
Kasa senden nung BJYM Tir aser MP, Anurag Thakur-ia, Morcha züngsemtemi linük wako bener linük tesem ajaklen linük meimba osang sangdongtsü, ta ashi.
You must be logged in to post a comment Login