India linük tatsükba küma Ganga ayong kongdar

Allahabad, April 30 (Agencies): Taküm India linük tesem ajungalen temperature maneni timbatimba küma Ganga ayong kongdar.
Yamuna aser Saraswati ayong na Ganga ayong nung yimokdak tesem, Prayag nung tzü kanga ajemba akumba atema Allahabad nüburtem kanga tebilemtsü kadar.
“Tanübo iba ayong nung tzü mali, nisungtemi ayongküm külen nungi külen tashi melamela jajateter. Tzü kanga ajema kümogo, aser iba ya asenok ajak atema tebilemtsü tulu ka lir,” ta Mohan Lal-i ashi.
Ano külen Moradabad nung school tanaurtemi tzü kümzüka ayutsü atema awareness sentong ka ayongzüka agiogo. Parnoki ozülu balala amer tzü lalushibongba anentsüla, aser tzü kümzüktsüla ta yimyim ayima liasü.
Shilem agir kaketshir kati, “Iba ya tongtibangtiba onük ka ta ni bilemer, kechiyong tzüji taküm. Onoki tzü kümzüka yuner aser iba osangji nüburtem dang sangdongner,” ta ashi.
Linük tesem aika nung temperature 45 degree Celsius tongnüa atur, aser tawa Telangana aser Odisha na nungbo tatsük ajanga nsiung 150 dak tema süogo.
Linük nung tatsüktiba ita ji May aser June na lir, ajisüaka takümbo April ita nunga state aika nung temperature normal dak tali kümogo.
Ministry of earth sciences ajanga ashiba agi, alima tatsükba akumba ya El Nino effect ajanga lir. El Nino ya Pacific nung tzüyim tema temperature timba akumba lir, aser ibaji ajanga  Asia aser east Africa kanga tatsük kümdaktsür, saka South America nungbo tzünglu sashia arua tzümetsüng lendong atalokdaktsür.