India linük ya high middle income economy akümtsü: World Bank CEO

New Delhi, November 04 (Agencies): ‘Doing business ranking’ nung India densemba sülen Honibarnü World Bank-i, Goods and Services Tax (GST) aser sorkari benokba mapatongtem ajanga taruba küm 30 nungbo India linük ya high middle income economy akümtsü, ta metetdaktsü.
Doing Business Report nung India temaba jenjang 100 nung densemba ya cricket asayadang century azükba den medemdanga World Bank Chief Executive Officer (CEO), Kristalina Georgieva-i, küm 15 tejaklen survey apibo tang iba jenjang tongtetba ya khenyongi balaka, ta ashi.
“India linük asadangra iba jenjang tongtetba ya balaka. Cricket asaya meimba linüki century tongtetba ya kanga tongtibang alizüng tongtetba ka lir,” ta lai ashi.
Doing Business global rankings nung yakümbo India jenjang 130buba nung ang liasü.
Ministry of Commerce and Industry-i ayongzükba India’s Business Reform sentong nung jembidang lai, “Onoki India nung reprangtetbaji, tang iba takok anguba ya tarutsü nung temelenshi tulu alitsü atema lir,” ta ashi.
Temelenshi adoktsü atema meranga inyakba asoshi Ato kilonser, Narendra Modi tenüngsanga World Bank CEO-i, GST ajanga internal market aintsü atema India nem maongka agütsür, ta ashi.
Foreign investment dak sendakba nung lai, foreign direct investment (FDI) 2013-14 küm US sen billion 36 aliba nungi tangbo US sen billion 60 jungogo, ta ashi.
“India nung sensak tia ya akhi otsü ka dang akumtsüsa jenjang ka nung lir ta onoki meteter. Iba alizüng tongtettsü atema atemzükba kümji 2026 küm lir, ajisüaka Ato kilonseri ibaji 2022 küm tashi nung tongtettsü tebilemba lir ta onoki angazüker. Tang tashi nung inyaka arubatem nung ajemdaker, ibaji takoktsü ta ni bilemer,” ta ashi.