India-Myanmar arrtsü lung belenshiba atema ashishiteper

Imphal, Chiteni (July) 7 (Agencies): India-Myanmar arrtsü nung ‘border pillar’ ka belenshiba ajanga tensa mejungi akümba ajanga Honibarnü Manipur kübok Moreh sub-division nung curfew alitsü ozüng agütsü. Border pillar ji India lushileni belen.
Moreh sub-division kübok tesem kar nung taruba ita trok atema aonung Criminal Procedure Code nung Section 144 kübok curfew alitsü tuyur ta Tengnoupal District Magistrate A Tombikanta-i tanü metetdaktsü.
Iba ozüng kübok aonung 7:00 ako nungi anepdang 4:00 ako tashi nisung pungu mesüra talila mesenzütsü aser prangpong-oset kecha bener mesenzütsü.
India lushi telungi border pillar No 81 belenba ajanga iba tesem nung mepetmesü adokba ajanga curfew ozüngji agütsür, ta ketdangser kati ashi.
Yashi Manipur Revenue Minister Karam Shyam-i iba tesem semdang aser idangji border pillars atema high power committee kati iba ashishitepba pillar atema sorkar nem osang sangoktsütsü ta metetdakja liasü.
Iba border pillar ji 1969-70 nung azüngba liasü, ta minister Shyam-isa ashi.
Taoba ita Kwatha Khunou nung alirtemi iba onük lemsatep. Myanmar nungeri ali atsünga agir ta parnoki tai tongloktsü.
Loktitentet aser political party aika Kwatha Khunou nungertemi ashiba pusema nungiter.