India-Myanmar arrtsü nung atsü yangluba UNC-i anemer

Guwahati, Janaury 14 (Agencies): Tuensang district kübok Pangsha yim nung India-Myanmar arrtsü nung atsü atsüba atema United Naga Council (UNC)-i anema nokdaker.
Iba ya Naga nunger dang kanga tim mesüi benshiba lir, ta shia UNC General Secretary, S Milan-i, “Atsü atsüba ya ajanga akhidang nungi ‘Naga kibong’ tsüngda tongtepratepba temeten agiener. Naga nunger kibong tsüngda tetsüngda adokdaktsütsü atema iba ama tasa tamajung yangluba ya Naga nunger ajaki anema nokdaktsüla,” ta ashi.
UNC-i, Naga nunger ajaki iba ya anema nokdaktsüla, kechiyong arrtsü nung atsü yangluba ya ajanga Naga nunger temetentem raksatsür, ta ashi.
UNC-isa, lenla ajak nung Naga kibong lemsadaktsütsü maneni merangba ya Naga nungertemi joko magizüktettsü. “Mapang kobika aser koba tashika Naga kibong tepsettsü atema sentong tamajung asadaktsütsü,” ta ashi.
Milan-isa, “Asen li ya sentaktepa lir aser tanga linük, lokti mesüra yimtsüng den sobaliba arrtsütem lemsateper. Iba arrtsü ya tanü tashi akhümtsübur. British nungeri nüburtem den masüngdangtepi akhidang nungi asen li lemsaja linük balala aser India state balala nung lemzüktsüba anema tanü tashi Naga nunger anema nokdaker,” ta ashi.
“Tiyazü tenokdangbatem balala ajanga maneni asen li aser nübur lemsadaktsütsü inyakbaji joko Naga nungeri kecha jenjang nunga magizüktettsü,” ta paisa shisem.