India-Myanmar arrtsülen telungpur telok tasen ka tentet

Imphal, April 9 (Agencies): Naga telungpur teloktem aser Manipur nungi telok kari mapang talangka atsünga agir aruba tesem nung Shanni Nationalities Army (SNA) ta ser telok tasen ka adokogo.
India-Myanmar arrtsü nung July 2009 mapang iba telok tentet aser headquarters ji Nwe Impha ta ser tenem ka nung lir, ta SNA-i ashir.
Shanni ta ajartem ya Shan nunger rongnung telok ka lir aser Kachin o Burmese nungertemi parnok anüolen tsütsü yok.
SNA-i Sagaing region nung Hkamti, Homalin aser Tamu, Mohnyin, Mogaung, Waingmaw, Hpakant aser Kachin state kübok tesem kar nung teseptem amenteta lir.
SNA nung brigade asem 891, 972 aser 753 lir aser sepai 1,000 dak tema lir ta ashir.
Sao Meim Liam aser Sao Khun Aung nati leniba SNA indang alizüng pungu lir aser itemji state balaka akümtsüba, drugs anema raratsü, federal union chichiba ka tentettsü, Shan sub-groups ajak longjemtsü, Shanni region renloktsü aser süngdong-lidong aser shirurutem kümzüka ayutsüba lir, ta ashi.
“Onok Shan state nung medenaka onok ya Shan kin lir. Onok Kachin state aser Sagaing region nung alir. Kachin nunger onok ya Bamar kübok alirtem ta ashir aser Myanmar sorkari sepaitemi onok ya Kachin telungpurtem atema osang belenertem ta ashir. Shanni nunger temetentem meshitsü atema SNA tentet” ta Brigade 891 nung commander lieutenant colonel Sai Aung Meim-i ashi.
SNA-i Kachin Independence Army mesüra NSCN-K mesüra ULFA ama tanga northeast telungpur teloktem den kechi koma tesentaktep ayutsü’ar osang mejangja lir.