India-Myanmar-i kiralongra anema raratsü bangjem

New Delhi, August 29 (Agencies): Myanmar nung küm aika sepai yimsüsüba sülen Aung San Suu Kyi’er National League for Democracy sorkar yimsüsüba kübok lenmang tasen ka nung aodang Hombarnü India-i mera ajak nung par linük nungita yaritsü nangzükogo.
Tanü New Delhi nung Ato kilonser, Narendra Modi aser Myanmar Tir, U Htin Kyaw na temaba jenjang nung senden ka amendang linük tesentaktep tajungba akümtsü aser linük anapronglai amalitepa tesem (southeast Asia) nung kiralongraba aser telungpur anema raratsü bangjemogo.
Linük anati connectivity, mozü aser renewable energy densema onük pezü nung amalitepa inyaktsü asoshi tezüngzüktep agiba den külemi aluyimba,  banking aser power densema tanga sectors nung tesentaktep tajungba akümtsü atema bangjemogo.
Osangbenertem senden nung tenati külemi jembidang Modi-i, linük anapronglai security nüngdaktem reprangteta tesem nung kiralongra aser telungpur anema amalitepa raratsü bangjem, ta metetdaktsü.
Myanmar ya India atema tongtibang kidanger linük ka lir, aser linük ana tsüngda arrtsü kilometer 1,640 lir.
India-i Myanmar den par linük nung Northeast telungpur telok balala indang training camp tem aliba tebilemtsü süoka jembir, aser Myanmar nung sorkar taseni linük nung lenla ajaklen terenlok alitsü atema sangdongba dak sentakba nung Modi-i, “India nunger nisung billion 1.25-i nenok mera ajak nung nungittsü, ta ni atangji nangzüker,” ta ashi.
India-i Myanmar den tensentaktep jenjang tajungba kümner ta shia Modi-i, “Myanmar tarutsü tajungkaji nenok indang nükjidong dang masü. Ibaji onok atema-a tejangraba ka lir,” ta metetdaktsü.
Myanmar Tir, Htin Kyaw-ia, Tir, Pranab Mukherjee-i jaokba nung ajemdaker pa India-i aru, ta ashi.
India anogo pezünü semdanga Honibarnü Tir Gaya tonga aruba sülen pai Buddhist nunger tekükem kitem semdang aser Deobarnü pai Agra nung Taj Mahal semdangba sülen New Delhi tonga arua liasü.