India & Myanmar-i NE telungpurtem anema inyaktsü

New Delhi, Mongputeni (October) 26 (Agencies): Myanmar litsü nung telungpur teloktem aser talisa NE telungpur teloktem anema mapa inyaktsü atema Hokolbarnü India aser Myanmar-i telemtetba ka agiogo.
Linük ana tsüngda international border nung security tsütsü amalitep alitsü aser nisung senzüsenbongba den shishilembaba nung yariteptsü atema telemtetba agi.
Myanmar nung northeast nungi telungpur telok aika lir aser tanü telemtetba agiba ya kanga tongtipang lir.
ULFA (I), NSCN (K), Manipur aser North Bengal nungi telungpur teloktem India arrtsü anasa Myanmar nung teseptem amenoka lir.
Anogo ananü India aser Myanmar tsüngda 22 buba National Level Meeting nung iba telemtetba agi. New Delhi nung amenba senden tanü tembangogo.
Linük ana tsüngda arem shiruru aser ozüngi memelaba mozütem shibelenba noktangtsü mulungtep. Maneni, international border management akangshitsü aser arrtsü tajunga latettsü atema subsidiary pillars yanglutsü telemtetba agi.
Senden nung India tenüng nung Union Home Secretary Rajiv Gauba aser Myanmar tenüng nung Major General Aung Thu, Deputy Minister lenisüba kübok teshimtet teloktem aden.
Myanmar nungi arurtemisa Union Home Minister Rajnath Singh den ajurutepa senden amen.