India, Myanmar na senteper kiralongraba anema raratsü

New Delhi, July 16 (Agencies): Myanmar foreign minister U Wunna Maung Lwin-i India semdanga aliba mapang Brihostibar nü External Affairs Minister, Sushma Swaraj den senden ka mena India aser Myanmar linük na senteper kiralongraba mapa ajak anema raratsü asoshi melungtepogo.

India linüki Myanmar nung telungpur mita aoba sülen tang mezüng Myanmar nungi high level ketdangseri linük semdangogo.

India-i Myanmar army jenjang ajungkettsü nung yaritsü aser navy amentettsü nunga yaritsü.

Lwin-i Ato kilonser Modi aser National Security Adviser (NSA) Ajit Doval na Bodhbar nü ajurua liasü.

Myanmar nungi tongti ketdangseri tang linük semdangba ya linük anapronglai linük ana tsüngda yimtenren aser security nung tesentaktep yanglunüba temaitsü lir.

India-i Myanmar nung telungpur mita maoba mapang foreign secretary S. Jaishankar-i Myanmar semdanga liasü aser telungpur mita aoba sülen NSA Ajit Doval-ia semdanga liasü.

Telungpurtem aser ULFA lenir Paresh Barua-i India anema inyaktsü asoshi Myanmar litsü amshir ta angateta yimtenren aser security mera agitsü nüngdak ta reprangteta iba linük anati iba mera agiogo.

Ano iba ya India asoshi tongtibang, kechiyong India aser Myanmar na tetsüngda tepila lira ibaji ajanga China dang tajangzük angutsü.

Lwin aser Sushma Swaraj na senden amenba sülen külem sangdong ka ajanga, arrtsülen junga ketdangsütsü asoshi mapang shia linük ana tsüngda Regional Border Committee senden amentsü, ta metetdaktsü.

Iba senden nungsa, arrtsülen nisung senzüba nung ken o jembitsü asoshi linük ana tsüngda tezüngzüktep ka agiogo aser arrtsü tongshi mebenteti aliba onükji India-Myanmar Joint Boundary Working Group kati bentettsü lemtetogo.