India NSG nung züngsem akumtsü atema telemtetba magi

New Delhi/Seoul, June 24 (Agencies): Tanü Hokolbarnü South Korea yimtiba, Seoul nung züngsem 48 aliba Nuclear Suppliers Group (NSG) Plenary senden tembangogo, ajisüaka China-i anir NPT sign masüba züngsemtemi anemba ajanga India linüki NSG nung züngsem akumtsü atema benoka liaka iba asoshi telemtetba magiteti tembangogo.

China-i, India NSG nung züngsem akumtsü benokbaji magizüktsüla, kechiyong parnoki Nuclear Non-Proliferation Treaty (NPT) sign masü ta nokdakba nung tanga linük 10-ia pusema liasü. India NSG züngsem akumtsü atema US, UK, France densema linük timbakati pusema liasü.

China nungi chief negotiator, Wang Qun-i maneni India NSG züngsem akumtsü atema anema nokdaka liasü.

China’er Department of Arms Control Director General, Wang-i osangbenertem dang, India ama NPT sign masüba linüktem NSG züngsem akumtsü atema telemtetba kati marur, ta ashi.

Paisa, “NSG züngsem akumtsü atema linük kati NPT sign asütsü nüngdak. Iba temzüng ya China-i latetba masü saka International linüktemi latetba temzüng lir,” ta ashi.

India linük NSG züngsem akumtsü atema China-i nokdanger asü ta asüngdangba langzüdang pai, NPT sign masüba linüktem dak sentakba onük nung tang tashi nung NSG-i kecha agizüka mali. Anungji China-i India pusemer mesüra anemer ta asüba onük mali, ta ashi.

Tanü China-i India anemba ajanga, yashi Tashkent nung Ato kilonser, Narendra Modi-i China Tir, Xi Jinping ajurua pa dang China-i India pusemtsüla ta mepishiba magizük, ta kuli tejangja sayur.

Yashi Uzbekistan yimtiba, Tashkent nung Shanghai Cooperation Organisation (SCO) senden alidang jurila senden ka nung Modi-i China Tir, Xi dang, India NSG nung züngsem akumtsü benokba nung China-i pusemdaktsüner, ta mepishia liasü.

India-i nuclear technology shishilembatettsü aser tanga linüktem dangia yoktettsü atema NST nung züngsem akumtsü atema meranger. Nuclear sector nung tongtibang onüktem NSG-i repranger aser iba telok nung adenba züngsem linüktemi nuclear technology shishilembatsü aser tanga linüktemnia yoktsü temeten angur.