India NSG nung züngsemtsü atema Foreign Secy. Seoul-i ogo

New Delhi, June 22 (Agencies): Asüng nungi tenzüka NSG Plenary akatsü lia tanü Indian Foreign Secretary, S Jaishankar South Korea yimtiba, Seoul tonga ogo; iba senden nung India-i NSG nung züngsemtsü atema benoktsü.
Hombarnü nungi tenzüka linük 48 official level senden akaba ajak nung Jaishankar-i tenük yoka liasü, aser India-a NSG nung züngsem akumtsü atema NSG züngsem linüktem ajurua jembitsü asoshi tanü pa Seoul tonga ogo.
New Delhi nungi sorkar osang ka ajanga, “Foreign Secretary Seoul-i aobaji osang tejangja. NSG plenary ano metenzük. Iba ya maparen tasak ka lir,” ta ashi.
Ano External Affairs Ministry ketdangser aser ‘Disarmament & International Security’ division in-charge,  Amandeep Singh Gill-a tanga linüktem teyari meshitsü aser India jenjang metetdaktsütsü atema Hombar nungi Seoul nung mungdar, ta tanga osang ka ajanga ashi.
India NSG nung züngsemtsü atema China-i tang tashi anemer.
Iba telok nung linük timbakati India züngsem akumtsü atema pusemer, ajisüaka China-i den külemi  Turkey, South Africa, Ireland aser New Zealand linüktemia India züngsemtsü anemer ta osang angazüker.
Iba telok nung India züngsemtsü benokba anema China-i, India-i Nuclear Non-Proliferation Treaty (NPT) tezüngzüktep magi ta ashir.
Ano külen India-ibo, NSG nung adentsü atema NPT tezüngzüktep agitsü menüngdak, kechiyong iba dak sentakba nung tamalen telemtetba agiba ka lir (France dak sentakba ozüng), ta ashir.
India-i nuclear technology shishilembatettsü aser tanga linüktem dangia yoktettsü atema NSG nung züngsem akumtsü atema meranger.
Nuclear sector nung tongtibang onüktem NSG-i repranger aser iba telok nung adenba züngsem linüktemi nuclear technology shishilembatsü aser tanga linüktemia yoktsü temeten angur.
China ketdangser osang ka ajanga, NSG nung India linük denra ibaji ajanga South Asia nung strategic balance anokshitsü aser India ji nuclear tashi aliba linük ka akumtsü, ta tashishiba olen ka sangdongogo.